Techinical News

russian spacecraft kosmos 482, Russian spacecraft భూమివైపు దూసుకొస్తున్న 50 ఏళ్లనాటి రష్యా వ్యోమనౌక.. శాస్త్రవేత్తల్లో ఆందోళన – soviet probe kosmos 482 launched to venus in 1972 could soon crash on earth

[ad_1]

శుక్రుడిపై పరిశోధనలకు సోవియట్ యూనియన్ 50 ఏళ్ల కిందట ప్రయోగించిన వ్యోమనౌక.. గమ్యానికి చేరడంలో విఫలమై భూమి దిశగా దూసుకొస్తోంది. వచ్చే 3 లేదా నాలుగేళ్లలో ఇది భూమిని ఢీకొట్టే అవకాశం ఉందని పరిశోధకులు అంచనా వేస్తున్నారు. దీంతో అది ఎక్కడ కూలిపోతుందోనని ఆందోళన వ్యక్తమవుతోంది. శుక్ర గ్రహంపై పరిశోధనలకు వెనీరా-8 అనే వ్యోమనౌకను 1972 మార్చి 27న నాటి సోవియట్ యూనియన్ కజికిస్థాన్‌లోని బైకనూర్ కాస్మోడ్రోమ్ నుంచి ప్రయోగించింది. దీనికి అనుబంధంగా ‘కాస్మోస్ 482’ ( cosmos 482 spacecraft)అనే మరో స్పేస్‌క్రాఫ్ట్‌ను అదే ఏడాది మార్చి 31న నింగిలోకి పంపింది.

దాదాపు మూడు నెలలు ప్రయాణం తర్వాత వెనీరా-8 విజయవంతంగా శుక్రుడి ఉపరితలానికి చేరుకుని, కొంత సమాచారాన్ని చేరవేసింది. అయితే, శుక్ర గ్రహాన్ని చేరిన తర్వాత 63 నిమిషాల పాటే పనిచేసిన వెనీరా నుంచి అక్కడ ప్రతికూల వాతావరణం కారణంగా సంకేతాలు నిలిచిపోయాయి. ఇదే సమయంలో ‘కాస్మోస్‌ 482’ మాత్రం భూ కక్ష్యను దాటలేక విఫలమయ్యింది. అప్పటి నుంచి అది భూమి చుట్టూ దీర్ఘవృత్తాకార కక్ష్యలో తిరుగుతూ క్రమంగా కిందకు దిగుతూ వస్తోంది. మొదట్లో 9,802 కిలోమీటర్ల దూరంలోని కక్ష్యలో ఉండే వ్యోమనౌక ప్రస్తుతం భూమికి మరింత దగ్గరైనట్టు గుర్తించారు.

మోల్నియా అనే రాకెట్ ద్వారా ప్రయోగించిన కాస్మోస్‌ 482 వ్యోమనౌకను భూకక్ష్య దాటించి, శుక్ర గ్రహం వైపు వెళ్లేందుకు వీలుగా సూర్యకేంద్ర కక్ష్యలోకి ప్రవేశపెట్టేలా ఏర్పాట్లు చేశారు. అయితే, మోల్నియాలోని ఎగువ దశ ఇంజిన్‌ అర్ధాంతరంగా ఆగిపోవడం వల్ల వ్యోమనౌక భూ కక్ష్యలోనే నిలిచిపోయింది. రాకెట్‌ ఇంజిన్‌ ఎంతసేపు పనిచేయాలో నిర్దేశించే టైమర్‌ను తప్పుగా సెట్‌ చేయడమే ఇందుకు కారణంగా భావిస్తున్నారు.

భూ కక్ష్యలోకి చేరిన తర్వాత రెండుగా విడిపోయిన కాస్మోస్‌ 482.. మెయిన్‌ బస్‌ భాగం 1972-023A 1981లోనే భూ వాతావరణంలోకి ప్రవేశించింది. శుక్రుడి ఉపరితలంపై దిగడానికి ఉద్దేశించిన డీసెంట్‌ క్రాఫ్ట్‌ 972-023E మాత్రం ఇంకా కక్ష్యలోనే కొనసాగుతోంది. గత 50 ఏళ్లలో డీసెంట్‌ క్రాఫ్ట్‌ 7,700 కిలోమీటర్ల మేర కిందకి దిగింది. మే 1 నాటికి 1,957 కిలోమీటర్ల కక్ష్యలో చేరుకోవడంతో ఇది తుది ప్రయాణ మార్గంలో ఉన్నట్లు శాస్త్రవేత్తలు పేర్కొన్నారు. ఈ క్రమంలో ఇది భూమిని ఢీ కొడుతుందని తెలిపారు.

నాసాకు సంబంధించిన జనరల్‌ మిషన్‌ అనాలసిస్‌ టూల్‌ (జీమ్యాట్‌) సాయంతో లెక్కించిన మ్యాక్రో ల్యాంగ్‌బ్రోక్‌ అనే శాస్త్రవేత్త.. 2024-2027 మధ్య ‘కాస్మోస్‌ 482’ భూ వాతావరణంలోకి ప్రవేశించొచ్చని తెలిపారు. రష్యా అంతరిక్ష శాస్త్రవేత్త పావెల్‌ షుబిన్‌ మాత్రం 2023-2025 మధ్య ఇది జరగొచ్చని అంచనా వేశారు. మొత్తం 1,180 కిలోల బరువుండే వెనీరా శ్రేణి వ్యోమనౌకలోని డిసెంట్‌ క్రాఫ్ట్‌ బరువు 495 కిలోలు.

సాధారణంగా ఉపగ్రహాలు, వ్యోమనౌకల భాగాలు కక్ష్య నుంచి విడిపోయి భూమి దిశగా వచ్చేటప్పుడు వాతావరణంలో ఒత్తిడికి గురయి తీవ్రస్థాయిలో వేడెక్కి మండిపోతాయి. కొన్ని శకలాలే ఈ ప్రక్రియను తట్టుకొని నేల లేదా సముద్రంలో కూలిపోతాయి.

కాగా, దట్టమైన శుక్రుడి వాతావరణ పొరలను తట్టుకొనేలా కాస్మోస్‌ 482 రూపొందించారు. దీంతో శుక్రుడి కన్నా తక్కువ సాంద్రత కలిగిన భూ వాతావరణ పొరల్లో తలెత్తే రాపిడిని ఇది సునాయాసంగా తట్టుకుంటుంది. కాబట్టి వ్యోమనౌక పూర్తిగా భూమిని తాకే అవకాశం ఉందని శాస్త్రవేత్తలు అంటున్నారు. శుక్రుడి ఉపరితలంపై వేగాన్ని తగ్గించుకుంటూ మృదువుగా దిగేందుకు వీలుగా డీసెంట్‌ క్రాఫ్ట్‌లో పారాచ్యూట్ వ్యవస్థను ఏర్పాటు చేశారు. అయితే, 50 ఏళ్లు దాటిపోవడంతో దాని పనితీరుపై అనుమానాలు వ్యక్తమవుతున్నాయి. దీంతో అది పుడమిని బలంగానే తాకొచ్చని అంటున్నారు.

భూమిపై 52 డిగ్రీల ఉత్తర, 52 డిగ్రీల దక్షిణ అక్షాంశాల మధ్య ఉన్న ప్రాంతంలో ఈ వ్యోమనౌక భూమిని చేరుతుందని అంచనా వేస్తున్నారు. ఈ పరిధిలోనే ఐరోపా, ఆసియా, అమెరికా ఖండాల్లోని కొన్ని ప్రాంతాలు, పూర్తిగా ఆఫ్రికా, ఆస్ట్రేలియాలు ఉన్నాయి. ఇది సముద్రంలోనే పడటానికి ఆస్కారం ఎక్కువగా ఉందని శాస్త్రవేత్తలు విశ్లేషిస్తున్నారు.

[ad_2]
Source link

Back to top button